დანიელ მორტენ ოლსენთან ერთად, შოთა არველაძის გამოსათხოვარ მატჩზე, უცხოელ მეგობართა გუნდს, ჰოლანდიელი ლუის ვან გაალი გაიყვანს.
სახელოვან მწვრთნელს, შოთას მიმართ თბილი სიტყვები არასდროს დაუშურებია და ცხადია, არველაძეზე, თბილისში ჩამოსვლის შემდეგაც აღმატებით ხარისხში საუბრობდა.
“ჩემს სამწვრთნელო კარიერაში შოთა ერთ-ერთი ყველაზე ჭკვიანი მოთამაშე გახლდათ. ფეხბურთი მხოლოდ ბურთის უაზრო დევნა არ გახლავთ. ხშირ შემთხვევაში, აზრიანი თამაშით შენზე ძლიერი მეტოქის დაჯაბვნაც შეიძლება, ამ მხრივ კი, არველაძეს ბადალი არ ჰყავდა.
მიხარია, რომ მან საკუთარი მეგობრების მწვრთნელად მომიწვია და აქ ჩამოსვლით, მისდამი პატივისცემა მინდა გამოვხატო. იმედი მაქვს, ჩინებული საღამო გამოვა.
მისი ასისტენტად მიწვევა მართლაც მსურს. შოთა სამწვრთნელო საქმის სწავლით დიდადაა დაინტერესებული და თუკი, შესაბამისი სერთიფიკატის აღებას მოახერხებს, ჩინებული კარიერაც ელის”.