მთავარი » 2008»ივნისი»6 » ლევან კობიაშვილი: თუ ნაკრებს ფინკეს ჩააბარებენ, წარმატებული იქნება
ლევან კობიაშვილი: თუ ნაკრებს ფინკეს ჩააბარებენ, წარმატებული იქნება
18:07
ლევან კობიაშვილი: თუ ნაკრებს ფინკეს ჩააბარებენ, წარმატებული იქნება
საქართველოს ეროვნული ნაკრები მწვრთნელის გარეშეა დარჩენილი. გარდა იმისა, რომ მსოფლიო ჩემპიონატის შესარჩევი ციკლის თამაშები მოახლოვდა, სულ მალე, მაისში, ორი ამხანაგური შეხვედრის გამართვა მოგვიწევს.
ჩვენმა ეროვნულმა გუნდმა უკვე ცამეტი მწვრთნელი გამოიცვალა, ახლა უკვე მეთოთხმეტეს ველით. ვინ იქნება საქართველოს ნაკრების დამრიგებელი? ეს არის კითხვა, რომელსაც ყველა გულშემატკივარი სვამს. ფეხბურთის ფედერაცია, ჯერჯერობით, სავარაუდო კანდიდატებსაც არ გვიმხელს, თუმცა ამბობს, რომ რამდენიმე ათეული ადამიანი განიხილება ჩვენი ნაკრების მთავარი მწვრთნელის პოსტზე.
პირველი, რაც, ალბათ, ყველაზე საინტერესოა, ის არის, უნდა იყოს თუ არა ეროვნული გუნდის მწვრთნელი უცხოელი. ამ საკითხზე რამდენიმე წლის წინ ყველა თანხმდებოდა, თუმცა ახლა აზრთა სხვადასხვაობა შეიმჩნევა. ეს ყველაფერი თემურ ქეცბაიას სამწვრთნელო წარმატებებმა გამოიწვია. თამამად შეგვიძლია ვთქვათ, რომ ეს ფეხბურთელი საქართველოს ნაკრებში ერთ-ერთი საუკეთესო იყო, თუ არა ერთადერთი.
მასზე არასდროს არავის დასცდენია აუგი, არასდროს უთქვამს, რომ მთელი გულით არ თამაშობდა და მაქსიმუმს არ იღებდა ნაკრებისთვის. როგორც ფეხბურთელზე, მასზე ბევრის თქმა შეგვიძლია, მწვრთნელობაზე კი, უპრიანი იქნება, რამდენიმე წლის შემდეგ ვისაუბროთ, თუმცა მისი ახლანდელი შედეგებიც ამ ფრონტზე შთამბეჭდავია. კვიპროსულ "ანართოსისთან" ერთად ქეცბაიამ ბევრ წარმატებას მიაღწია. მოგეხსენებათ, თავიდან მოთამაშე-მწვრთნელად ირჯებოდა, ხოლო მას შემდეგ, რაც ფეხბურთის თამაშს გამოემშვიდობა, მხოლოდ მწვრთნელობას მიჰყო ხელი.
რთული სათქმელია, წარმატებული იქნება თუ არა თემურ ქეცბაია საქართველოს ნაკრებშიც. რაც მის მინუსად მიიჩნევა, ისაა, რომ ნაკრების გაწვრთნის გამოცდილება არა აქვს, თან თემური არასდროს გამოირჩეოდა ლიდერის თვისებებით მოედნის გარეთ, თორემ, მოედანზე ლიდერიც იყო, თამაშის წარმმართველიც და საუკეთესოც. რამდენად შეძლებს ის ჩვენს ნაკრებში ესოდენ საჭირო დისციპლინის დამყარებას, რთული სათქმელია.
პლუსები კი აშკარად ბევრი აქვს. პირველ რიგში, ის ყველაზე კარგად იცნობს შიგნიდან ქართულ ფეხბურთს. ყველაზე კარგად იცის მისი ძლიერი და სუსტი მხარეები, იცის ის საფეხბურთო მენტალიტეტი, რომელსაც აგერ, უკვე, მერამდენე მწვრთნელმა ვერაფერი მოუხერხა. ამასთან, ყველა საუბრობს მის პროფესიონალიზმსა და პრინციპულობაზე.
ეს უკანასკნელი კი ყველაზე მნიშვნელოვანია ჩვენს შემთხვევაში. ქართველებიდან სახელდება შოთა არველაძის კანდიდატურაც, თუმცა, არა გვგონია, ეს რეალობასთან მიახლოებული იყოს, ის ჯერ კიდევ ფეხბურთს თამაშობს და ასეთ საპასუხისმგებლო პოსტს, ვფიქრობთ, არ დათანხმდება. რაც შეეხება უცხოელ სპეციალისტებს, ვარაუდები მრავალია. კვლავ აქტუალური გახდა ბორა მილუტინოვიჩის კანდიდატურა, რომელიც ტოპმიოლერის დანიშვნამდეც განიხილებოდა.
საუბარია ივო შუშაკის დაბრუნებაზე. რამდენად ისურვებს ხორვატი სპეციალისტი ნაცნობ მდინარეში ხელმეორედ შესვლას, რთული სათქმელია. ისე კი, ფაქტია, რომ სწორედ მის ხელში მიაღწია საქართველოს ნაკრებმა, მართლაც რომ ისტორიულ გამარჯვებას. რუსეთის ნაკრების დამარცხების დროს, სწორედ ივო შუშაკი იყო მთავარი მწვრთნელი. მისი ხელმძღვანელობით მიაღწია წარმატებებს თბილისის "დინამომ".
დსთ-ის თასი აიღო მაშინ ქართულმა კლუბმა. შეიძლება ეს ყველაფერი შემთხვევითობასა და გამართლებას მიაწერო, ვინ იცის, შეიძლება ასეცაა... გამოითქვა ლუის ვან გაალის კანდიდატურაც, რა თქმა უნდა, ამ სპეციალისტის კვალიფიკაციაში ეჭვს ვერავინ შეიტანს, ჰოლანდიის ნაკრების ყოფილი მწვრთნელი, "ალკმაარში" შოთა არველაძის დამრიგებელი იყო. ვან გაალი მეტად მომთხოვნ, მკაცრ და დისციპლინის მოყვარულ მწვრთნელად მიიჩნევა.
ამ მხრივ, ნამდვილად მისაღები უნდა იყოს ჩვენთვის, თუმცა დათანხმდება თუ არა იგი საქართველოს ნაკრების ჩაბარებას, რთული სათქმელია. დაბოლოს, ფოლკერ ფინკე, რომელიც ქართველი ფეხბურთელების დიდ სიყვარულშია "ეჭვმიტანილი". მის ხელში გაიარა ლევან კობიაშვილმა, ლევან ცქიტიშვილმა, ალექსანდრე იაშვილმა. გერმანელი სპეციალისტი ურიგო არ უნდა იყოს, მით უმეტეს, კარგად იცნობს ქართველ ფეხბურთელებს, მაგრამ, რამდენად გვინდა კიდევ ერთი გერმანელი მწვრთნელი, ესეც საკითხავია.
მეორე საკითხია, რამდენად ნიშნავს მაღალი კვალიფიკაციის მწვრთნელის ჩამოყვანა პრობლემების გადაჭრას. ალბათ, ნებისმიერ მწვრთნელს გაუჭირდება საქართველოს ნაკრებში მუშაობა, თუ სხვა საკითხები არ მოგვარდა. რომელ ნაკრებზეა საუბარი, თუ ეროვნულმა ჩემპიონატმა ვერ "ამოქაჩა", ტოპმიოლერს მუდმივად იმაზე საყვედურობდნენ, საქართველოში არ არის და ეროვნულ ჩემპიონატს არ აკვირდებაო. საინტერესოა, თამაშობენ კი მასში ნაკრებისთვის გამოსადეგი ფეხბურთელები?
ყველაფრის თავიდათავი ბავშვთა ფეხბურთია, თუ საძირკველიდანვე სწორად არ აღიზარდა ნერგი, რთულია მერე, მას ჯანსაღი ნაყოფი მოსთხოვო. მოკლედ, ვარაუდები და პრობლემები ბევრია, დრო კი ცოტა. ყველაზე მნიშვნელოვანი, ამ შემთხვევაში, ალბათ, თავად ფეხბურთელების აზრია. ჩვენც სწორედ ამიტომ, ეროვნული ნაკრების ვიცე-კაპიტანს, ლევან კობიაშვილს დავეკითხეთ.
"ჯორჯიან თაიმსი": ლევან, ბევრი დავაა იმაზე, ქართველი უნდა იყოს ნაკრების მწვრთნელი, თუ უცხოელი. თქვენ როგორ ფიქრობთ, რომელი აჯობებს?
ლევან კობიაშვილი: ვიცი, რომ ამ თემაზე ბევრი დავაა. მე ადრეც ვამბობდი და ახლაც არ შემიცვლია აზრი, რომ უმჯობესია, თუ ნაკრების მწვრთნელი უცხოელი სპეციალისტი იქნება. მაგრამ, ამასთან ერთად, ვფიქრობ, რომ აუცილებელია ქართველი მწვრთნელების ჩართვაც. ძალიან კარგი იქნება, თუ უცხოელ სპეციალისტს გვერდით ქართველი დამხმარე მწვრთნელები ეყოლება. ეს კარგი სკოლა იქნება, ისწავლიან და მომავალში, შესაძლოა, იმ დონემდე მივიდეთ, რომ უცხოელები აღარც დაგვჭირდეს.
_ რამდენიმე კანდიდატურა უკვე დასახელდა, ოღონდ არაოფიციალურად, რა თქმა უნდა. თქვენ თუ გსმენიათ სავარაუდო კანდიდატურებზე?
_ კანდიდატებზე ვერაფერს გეტყვით, კი გავიგე რამდენიმე მათგანზე, მაგრამ არ ვიცი, რამდენად სერიოზულია ეს. თუ არ ვცდები, ჯერჯერობით, ოფიციალურად არავინ დასახელებულა.
_ მაშინ მე გეტყვით. ერთ-ერთი, რომელიც აქტიურად სახელდება, არის თქვენი ყოფილი მწვრთნელი ფოლკერ ფინკე. ამ სპეციალისტს საკმაოდ კარგად იცნობთ...
_ რაც შეეხება ფინკეს კანდიდატურას, გეთანხმებით, ძალიან კარგად ვიცნობ. წლების განმავლობაში მასთან ერთად ვიმუშავე და თამამად ვიტყვი, რომ პირველად მასი დახმარებით მოვიკიდე ფეხი ევროპულ ფეხბურთში, მან დამაყენა სწორ გზაზე. ყველანაირად დადებითად დავახასიათებ მას, ჩემთვის ერთ-ერთი წარმატებული მწვრთნელია და დარწმუნებული ვარ, რომ თუ ჩვენს ნაკრებს ჩააბარებენ, ასევე წარმატებული იქნება. თუმცა კიდევ ერთხელ გეტყვით, რომ არა ვარ დარწმუნებული, ეს კანდიდატურა განიხილებოდეს.
_ ასევე სახელდება თქვენი მეგობრის, თემურ ქეცბაიას კანდიდატურაც, მასზე რას იტყვით?
_ თემურზეც გავიგე, თუმცა რამდენად სერიოზულია ეს ყველაფერი, არ ვიცი. მასზე იმის თქმა შემიძლია, რომ მწვრთნელის წარმატებული კარიერა აქვს. რაც მან კვიპროსში გააკეთა, ადვილი მისაღწევი ნამდვილად არ იყო. გუნდი ჩემპიონი გახადა და წელსაც იბრძვიან ამ ტიტულისთვის. ეს ნამდვილად არაა ურიგო შედეგი. ეს ყველაფერი იმის ნიშანია, რომ თემურს ყველანაირი მონაცემი აქვს იმისთვის, რომ დიდი მწვრთნელი გახდეს, სწორ გზაზე დგას. როგორც ფეხბურთელი, ვფიქრობ, რომ ჩემი ზედმეტი ქება არ არის საჭირო, მის გვერდით მითამაშია და კარგად ვიცნობ.
მე მგონი, ყველამ იცის, როგორი თავდადებით თამაშობდა ყოველთვის და ყველაფერს აკეთებდა, რომ წარმატება მიგვეღწია. დარწმუნებული ვარ, რომ ნაკრებში თუ დანიშნავენ, ისეთივე მონდომებით, ენთუზიაზმით იმუშავებს და მთელ გულს ჩადებს ამ საქმეში. ურიგო კანდიდატურა ნამდვილად არ არის. მთავარი ის არის, ნაკრებმა ბოლოს და ბოლოს კარგი შედეგი აჩვენოს, ხოლო ვის ხელში იქნება, ეს თითქმის უმნიშვნელოა.
კატეგორია: საქართველო |
ნანახია: 978 |
დაამატა: bera
| რეიტინგი: 5.0/1 |
Euro Cup Soccer 2008
