პირეუსის ”ოლიმპიაკოსის“ ხელმძღვანელობამ, ბრაზილიელი ფეხბურთელის რივალდოს ქონების დაყადაღების თხოვნით, სასამართლოს მას შემდეგ მიმართა, რაც ფორვარდმა ბერძნული კლუბის მიერ მიღწეული წარმატებების სამართლიანობა ეჭვქვეშ დააყენა, - იუწყება ”ასოშეიტედ პრესი“. ”ოლიმპიაკოსში“თამაშისას არა ერთხელ გამიგია, რომ საბერძნეთის ფეხბურთის ფედერაციის ბევრი თანამშრომელი ჩვენი კლუბის შტატში ირიცხება. ეჭვი მეპარება, რომ პირეელებთან ერთად, სამი ტიტული სამართლიანად მოვიგე“ - განაცხადა რივალდომ, რომელიც ადრე ”ოლიმპიაკოსში“ გამოდიოდა, ახლა კი ათენის აეკ-ის ღირსებას იცავს. საბერძნეთის ბოლო ჩემპიონატის შედეგებმა ქვეყანაში დიდი პოლემიკა გამოიწვია, ვინაიდან ”ოლიმპიაკოსს“ ”აპოლონთან“ ტექნიკური მოგება ჩაუთვალეს, რაც პირეელებისთვის აეკ-თან უპირატესობის მოსაპოვებლად გადამწყვეტი აღმოჩნდა.
”ოლიმპიაკოსი“ რივალდოსგან მორალური ზიანის ასანაზღაურებლად 5 მილიონ ევროს ითხოვს. გარდა ამისა, კლუბმა სასამართლოს მიმართა თხოვნით, რომ ბრაზილიელის ქონებას საბერძნეთში ყადაღა დაადოს და ამით, კომპენსაციის მიღება გაინაღდოს. სასამართლო რივალდოს მხრიდან ცილისწამების ფაქტის განხილვას 2009 წელს დაიწყებს, ხოლო ქონებაზე ყადაღის დადების თაობაზე მიმდინარე წლის 2 ივნისს იმსჯელებს.
|
Euro Cup Soccer 2008
