ევროპის სუპერთასის გათამაშების იდეა 1972 წელს ჰოლანდიური ჟურნალის ”დე ტელეგრაფის” თანამშრომელს და მოგვიანებით გამომცემელს ანტონ ვიტკამპს დაებადა. იმ წლებში ჰოლანდიური ფეხბურთი, როგორც საკლუბო, ასევე სანაკრებო, აღმავლობას განიცდიდა და ვიტკამპსაც სურდა ევროპის საფეხბურთო სამყაროსთვის ისეთი გათამაშება შეეთავაზებინა, რომელიც ჰოლანდიურ საკლუბო ფეხბურთს მეტ დიდებას შემატებდა.

ვიტკამპის ჩანაფიქრით, ევროპის სუპერთასისთვის ჩემპიონთა თასის მფლობელს და თასების მფლობელთა თასის გათამაშების გამარჯვებულს უნდა ეთამაშათ. მან იდეა ტურნირების მაშინდელ გამარჯვებულებს - ჰოლანდიის ”აიაქსს” და შოტლანდიის ”გლაზგო რეინჯერსს” - გაუზიარა, ამავდროულად, უეფა-საც სთხოვა თანადგომა.

ჟურნალისტის ჩანაფიქრით, თასის მფლობელი ორი შეხვედრის შედეგად გაირკვეოდა - ისევე როგორც ევროპის საკლუბო ტურნირებში, კლუბები მიმოსვლით, ერთმანეთის მოედნებზე გაეჯიბრებოდნენ.

თუ ”აიაქსი” და ”გლაზგო რეინჯერსი” ვიტკამპის წინადადებას დათანხმდნენ, უეფა-მ ევროპის სუპერთასის ოფიციალური აღიარებისგან თავი შეიკავა. მიზეზი ის იყო, რომ შოტლანდიური კლუბი, გულშემატკივართა უსაქციელობის გამო, თავად უეფა-ს მიერ ერთი წლით იყო დისკვალიფიცირებული ევროპის საკლუბო ტურნირებიდან.

მიუხედავად უეფა-ს უარისა, 1972 წელს ევროპის სუპერთასი პირველად გათამაშდა: ჩემპიონთა თასის მფლობელმა ამსტერდამის ”აიაქსმა” თასების მფლობელთა თასის მფლობელ ”გლაზგო რეინჯერსს” ორი მატჩის ჯამში 6:3 სძლია და ჯილდოს დაეუფლა. ორივე შეხვედრა ”დე ტელეგრაფის” ფინანსური მხარდაჭერით გაიმართა.

1973 წლიდან ევროპის სუპერთასი უეფა-ს ეგიდით თამაშდება და მისი ოფიციალური სახელწოდებაა უეფა-ს სუპერთასი.

1998 წლამდე ევროპის სუპერთასის მფლობელი ორი შეხვედრის ჯამში ვლინდებოდა, თუმცა იყო რამდენიმე გამონაკლისი: 1974, 1981 და 1985 წლებში ევროპის სუპერთასი არ გათამაშდა, ხოლო 1984, 1986 და 1991 გამარჯვებული მხოლოდ ერთი მატჩის შედეგად გამოვლინდა.

1974 წელს ჩემპიონთა თასი დასავლეთ გერმანიის ”ბაიერნმა” მოიგო, ხოლო თასების მფლობელთა თასი - გერმანიის დემოკრატიული რესპუბლიკის ”მაგდებურგმა”. მეტოქეებმა ევროპის სუპერთასისთვის თამაშზე პოლიტიკური მოსაზრებების გამო შეიკავეს თავი.

1981 წელს ჩემპიონთა თასის და თასების მფლობელთა თასის მფლობელები - ინგლისის ”ლივერპული” და თბილისის ”დინამო” - გადატვირთული კალენდრის გამო ვერ შეთანხმდნენ მატჩის თარიღზე.

1985 წელს ჩემპიონთა თასის მფლობელი ტურინის ”იუვენტუსი” მხოლოდ იმიტომ ვერ გაეჯიბრა თასების მფლობელთა თასის გამარჯვებულ ლივერპულის ”ევერტონს”, რომ ეს უკანასკნელი (ისევე როგორც სხვა ინგლისური კლუბები) უეფა-მ ევროპის საკლუბო ტურნირებიდან 5 წლით მოკვეთა. მიზეზი - ”ეიზელის” ტრაგედია.

1984 წელს ერთადერთი შეხვედრა მხოლოდ ტურინში გაიმართა, სადაც თასების მფლობელთა თასის მფლობელმა ”იუვენტუსმა” ჩემპიონთა თასის გათამაშების გამარჯვებული ”ლივერპული” 2:0 დაამარცხა. საპასუხო მატჩის თარიღი ინგლისურმა კლუბმა ვერ გამოძებნა.

1986 წელს ჩემპიონთა თასის მფლობელი რუმინეთის ”სტიაუა” და თასების მფლობელთა თასის გამარჯვებული კიევის ”დინამო” მონაკოში, ანუ ნეიტრალურ მინდორზე, პოლიტიკური მოსაზრებების გამო გაეჯიბრნენ ერთმანეთს.

1991 წელს ასევე ერთი მატჩი გაიმართა: თასების მფლობელთა თასის მფლობელმა ”მანჩესტერ იუნაიტედმა” ჩემპიონთა თასის გათამაშების გამარჯვებული ბელგრადის ”ცრვენა ზვეზდა” 1:0 დაამარცხა. საპასუხო მატჩი იუგოსლავიაში შექმნილი მძიმე პოლიტიკური ვითარების გამო არ შედგა.

1998 წლიდან უეფა-ს სუპერთასის მატჩებს მონაკოს სათავადოს ქალაქი მონტე-კარლო, სტადიონი ”ლუი II” მასპინძლობს. 1998 და 1999 წლებში ჩემპიონთა თასის და თასების მფლობელთა თასის მფლობელები ეჯიბრებოდნენ ერთმანეთს, ხოლო 2000 წლიდან ევროპის სუპერთასი ჩემპიონთა თასის და უეფა-ს თასის მფლობელებს შორის თამაშდება. მიზეზი: 1999 წელს უეფა-მ თასების მფლობელთა თასის გათამაშება გააუქმა.

რამდენიმე საინტერესო ფაქტი

...ევროპის სუპერთასი ყველაზე მეტჯერ - 8-ჯერ - იტალიის კლუბებმა მოიგეს, ხოლო კლუბებს შორის ყველაზე წარმატებული იტალიის ”მილანია”: 4 გამარჯვება და 2 მარცხი. სხვათა შორის, ”მილანმა” 1993 წელს ევროპის სუპერთასისთვის მატჩში ჩემპიონთა თასის მფლობელი მარსელის ”ოლიმპიკი” შეცვალა: უეფა-მ ფრანგული კლუბი გარიგებულ მატჩებში მონაწილეობაში ამხილა და მკაცრად დასაჯა.

...უცნაურია, მაგრამ ფაქტია: ევროპის სუპერთასი გერმანიის კლუბებს არასდროს მოუგიატ, არადა, ამ ქვეყნის წარმომადგენლებმა ჯილდოსთვის 7-ჯერ გაილაშქრეს.

...1975 წელს, კიევის ”დინამოს” და მიუნხენის ”ბაიერნის” მეორე შეხვედრას კიევში 110 ათასი გულშემატკივარი დაესწრო. არც მანამდე და არც მას შემდეგ ევროპის სუპერთასის მატჩს ამდენი მაყურებელი არ ჰყოლია.

...ევროპის სუპერთასის 1996 წლის მფლობელმა ტურინის ”იუვენტუსმა” მეტოქე ”პარი სენ-ჟერმენი” ორი მატჩის ჯამში 9:2 დაამარცხა, ასეთი უპირატესობით კი ჯილდო არავის მოუგია.

და ბოლოს: 2003 წელს ევროპის სუპერთასი ჩემპიონთა ლიგის გამარჯვებულმა ”მილანმა” მოიგო - უეფა-ს თასის მფლობელ ”პორტუს” 1:0 სძლია. მიუხედავად იმისა, რომ ამ შეხვედრაში არ ითამაშა, სუპერთასს საქართველოს ნაკრების კაპიტანი კახა კალაძეც დაეუფლა. ის პირველი და დღემდე ერთადერთი ქართველია, რომელმაც ეს ჯილდო მოიგო.