მთავარი » 2008»მაისი»14 » ხიზანიშვილმა უეფას თასის ფინალში უგოლო ფრე იწინასწარმეტყველა
ხიზანიშვილმა უეფას თასის ფინალში უგოლო ფრე იწინასწარმეტყველა
23:20
ინგლისური “ბლექბერნ როვერსის” ქართველი ფეხბურთელი ზურაბ ხიზანიშვილი უეფას თასის ფინალში გლაზგოს “რეინჯერს” უქომაგებს და ექს-თანაგუნდელების წარმატებით გულითაც გაიხარებს. 26 წლის ხიზანიშვილმა გლაზგოურ გრანდში სამი სეზონი გაატარა და იქიდან მხოლოდ კარგი მოგონებები შერჩა. ზურაბი მანჩესტერში ცხოვრობს და “სიტი ოფ მანჩესტერზე” “რეინჯერსისა” და სანკტ-პეტერბურგის “ზენიტის” ფინალურ შეხვედრასაც უცილობლად დაესწრებოდა, პრემიერლიგის დასრულების შემდეგ, სამშობლოში დაბრუნება რომ არ ერჩია. ახლა, ხიზანიშვილი “ჩაფრებს” თბილისში, ტელევიზორთან უქომაგებს. “ნამდვილად არ ველოდი, თუ ისინი ფინალში გააღწევდნენ, ასე რომ სამშლობლოში დასაბრუნებლად ბილეთი წინასწარ შევუკვეთე, ახლა კი, მისი გაუქმება აღარ გამოდიოდა. მიუხედავად ყველაფრისა, ჩემი გული მანჩესტერში “რეინჯერსთან” ერთად იქნება. ამ გუნდში ხომ გამორჩეული სამი წელი გავატარე. იმედი მაქვს, ბიჭები დიდ წარმატებას მიაღწევენ”. “რეინჯერსის” თავკაცმა ალექს მაკლიშმა საქართველოს ნაკრების მცველი 2003 წელს “დანდიდან” გადაიბირა. ბედის ირონიით, ზურაბს იმ დროს ასევე “ბლექბერნში” მიმავალი იტალიელი ლორენცო ამორუზო უნდა შეეცვალა, რომელსაც გლაზგოელთა რიგებში 59 მატჩი ჰქონდა ჩატარებული. “როვერსში” ხიზანიშვილმა ბარი ფერგიუსონისა და ფერნანდო რიკსენის მხარდამხარაც ითამაშა. ფერგიუსონი დღესაც გუნდის კაპიტანია, რიკსენმა კი “ზენიტს” მიაშურა და ფინალში შოტლანდიელთა წინააღმდეგ იასპარეზებს. “ფერგიუსონს ჩინებული ტექნიკა გააჩნია და ბურთს თითქმის არ კარგავს. მის გარდა, ნაჩო ნოვოსთანა და გოლკიპერ ალან მაკგრეგორთანაც ჩინებული ურთიერთობა გამაჩნია. ჩემი აზრით, ფინალი 0:0 დასრულდება, შემდეგ კი გამარჯვება “რეინჯერსს” დარჩება”, - დასძინა ხიზანიშვილმა.