ჰოლანდიის ფეხბურთელთა ეროვნული ნაკრების მთავარმა მწვრთნელმა მარკო ვან ბასტენმა ევროპის ჩემპიონატისთვის გამოძახებული გაფართოებული შემადგენლობიდან “ტვენტეს” გოლკიპერი სანდერ ბოშკერი და “ფეინოორდის” ნახევარმცველი დენი ლანზაატი დაითხოვა.
როგორც სააგენტო AP-ი იტყობინება, ვან ბასტენმა ამგვარი გადაწყვეტილება უკრაინასთან ამხანაგური მატჩის შემდეგ მიიღო, რომელიც მისი გუნდის გამარჯვებით 3:0 დასრულდა. ბოშკერს აღნიშნულ შეხვედრაში მონაწილეობა არ მიუღია, ხოლო ლანზაატი თამაშში რაფაელ ვან დერ ვაარტის ნაცვლად ჩაერთო და მოედანზე სულ 11 წუთი დაჰყო.
ამგვარად, ჰოლანდიელთა თავკაცის განკარგულებაში 24 ფეხბურთელი დარჩა, ანუ ერთით მეტი ვიდრე ევროპის ჩემპიონატის განაცხადში შეუძლია შეიყვანოს. ავსტრია-შვეიცარიაში წამსვლელი საბოლოო შემადგენლობა ვან ბასტენმა, ისევე როგორც ჩემპიონატის მონაწილე სხვა ნაკრებთა მწვრთნელებმა, 28 მაისამდე უნდა დაასახელოს.
ჰოლანდიის ეროვნული ნაკრები კონტინენტის უმთავრეს საფეხბურთო ტურნირზეC ჯგუფში იასპარეზებს, სადაც მისი მოწინააღმდეგეები საფრანგეთის, იტალიისა და რუმინეთის ნაკრებები იქნებიან.