ინგლისის ფეხბურთელთა ეროვნული ნაკრების მთავარი მწვრთნელი ფაბიო კაპელო, აშშ-ის ნაკრებთან ამხანაგურ მატჩში, რომელიც ოთხშაბათს გაიმართება, “ჩელსის” მცველ ჯონ ტერისთვის კაპიტნის სამკლაუვურის დაბრუნებას აპირებს.
როგორც The Times-ი იტყობინება, იტალიელ სპეციალისტს ამ ჟესტით სურს მხარდაჭერა გამოუცხადოს ფეხბურთელს, რომელიც “მანჩესტერ იუნაიტედთან” ჩემპიონთა ლიგის ფინალურ მატჩში გადამწყვეტი პენალტის ვერგამოყენების გამო ფსიქოლოგიურ პრობლემას განიცდის.

მას შემდეგ, რაც ინგლისის ეროვნულ ნაკრებს ფაბიო კაპელო ჩაუდგა სათავეში, გუნდმა ორი თამაში გამართა. იტალიელი სპეციალისტისთვის სადებიუტო მატჩში შვეიცარიის ნაკრებთან ინგლისელებს სტივენ ჯერარდმა უკაპიტნა, ხოლო საფრანგეთთან დაპირისპირებაში კაპელომ კაპიტნის სამკლავური რიო ფერდინანდს მიანდო. მწვრთნელი აცხადებს, რომ კაპიტნის თაობაზე საბოლოო გადაწყვეტილებას 2010 წლის მსოფლიოს ჩემპიონატის შესარჩევი ტურნირის დაწყების წინ მიიღებს.