საქართველოს ფეხბურთელთა ეროვნულმა ნაკრებმა მორიგი უფერული და უხარისხო მატჩი ჩაატარა. ქვეყნის უპირველესი გუნდი, რომელსაც ახალი მწვრთნელის მოძიებამდე ახალგაზრდული ნაკრების თავკაცი პეტარ სეგრტი წვრთნის, დღეს, ტალინში, “ა ლე კოქ არენა”-ზე, ამხანაგურ მატჩში ესტონეთის ნაკრებთან მარცხს გადაურჩა. შეხვედრა ფრედ 1:1 დასრულდა. პეტარ სეგრტისგან, დაბეჩავებული გუნდის ფეხზე დაყენებას არც არავინ ელის, მითუმეტეს, მხოლოდ რამდენიმე ვარჯიშის ჩატარების შემდეგ, თუმცა ხორვატი სპეციალისტის მიერ მისთვის სადებიუტო მატჩის წინ გამოთქმული იმედი, რომ “ჯვაროსნებს” მონდომებას გაუღვივებდა, ალბათ უკვე გაცრუვდა. ნაკრებმა მისთვის “ჩვეულ სტილში” ითამაშა. ისევე როგორც ესტონეთის ნაკრებმა, რომელმაც ქართველთაგან განსხვავებით, საკუთარი ადგილი კარგად იცის და არც ზედმეტი ამბიცია აწუხებს. რაც შეეხება უშუალოდ მატჩს, რომელიც გუნდების მსგავსად უხეირო მოედანზე გაიმართა, შეხვედრის პირველ ტაიმში მეტოქეებმა ორ-ორი საგოლე მომენტი გაცვალეს. ქართველთაგან გოლის გატანის შანსი, ალექსანდრე იაშვილის კარგი გადაცემების შემდეგ ალექსიძესა და კვირკველიას ჰქონდათ, თუმცა პირველ ეპიზოდში ესტონელთა კარის დარაჯმა ითამაშა დამაჯერებლად, ხოლო კვირკველიას დარტყმა არ გამოუვიდა. გაცილებით რეალური იყო საქართველოს ნაკრების კართან შექმნილი ორი მომენტი, მალხაზ ასათიანის შეცდომების შემდეგ მეკარესთან პირისპირ ჯერ ვიიკმაე დარჩა, ხოლო შემდეგ პურიე, ორივე ეპიზოდში სტუმრები გოლს ესტონელი შემტევების დაბალი ოსტატობისა და ლორიას მონდომების წყალობით გადაურჩნენ. უგოლოდ დასრულებული პირველი ტაიმის შემდეგ ანგარიშის გახსნის კარგი შანსი 51-ე წუთზე ქართველებს მიცათ, საჯარიმოს მისადგომებიდან ალექსანდრე იაშვილის გამიზნული დარტყმის შემდეგ მასპინძლები მეკარემ იხსნა, რომლის მოგერიებული ბურთი ხარიხას მოხვდა. თუმცა 13 წუთში ქართველებმა გოლი საკუთარ კარში მიიღეს, ესტონელთა სტანდარტულის დროს უჩა ლობჟანიძემ საჯარიმო მოედანზე რაიო პიიროია წესის დარღვევით შეაჩერა, თერთმეტმეტრიანი დარტყმა კი ტარმო კინკმა ზუსტად შეასრულა და თავისი გუნდი დააწინაურა. “ჯვაროსნები” მარცხისგან შეცვლაზე შესულმა ლევან ყენიამ იხსნა, რომელმაც 82-ე წუთზე იაშვილის მახვილგონივრული გადაცემით ისარგებლა და ეროვნული ნაკრების შემადგენლობაში პირველი გოლი გაიტანა. მომდევნო ამხანაგურ მატჩს საქართველოს ნაკრები 31 მაისს, ქალაქ ვიზეუში, პორტუგალიის ნაკრებთან გამართავს და ალბათ ძნელად წარმოსადგენი არ უნდა იყოს, რას გახდებიან “ჯვაროსნები” ასეთი თამაშით ევროპული სეზონის საუკეთესო ბომბარდირ კრიშტიანუ რონალდუსთან და კომპანიასთან...
საქართველოს ფეხბურთელთა ეროვნულმა ნაკრებმა მორიგი უფერული და უხარისხო მატჩი ჩაატარა. ქვეყნის უპირველესი გუნდი, რომელსაც ახალი მწვრთნელის მოძიებამდე ახალგაზრდული ნაკრების თავკაცი პეტარ სეგრტი წვრთნის, დღეს, ტალინში, “ა ლე კოქ არენა”-ზე, ამხანაგურ მატჩში ესტონეთის ნაკრებთან მარცხს გადაურჩა. შეხვედრა ფრედ 1:1 დასრულდა. 
Euro Cup Soccer 2008
