ექსპერტები ესპანეთის ნაკრებს ერთ-ერთ ფავორიტად მიიჩნევენ…
- მირჩევნია ფავორიტად არ გვასახელებდნენ. ამის მიზეზი ალბათ, ყველასთვის ნათელია. არ მინდა მთელმა ქვეყანამ წინასწარ იწამოს ჩემპიონობის და ფსიქოლოგიურ წნეზში ჩაგვაგდონ. თუ მაინცდამაინც ფავორიტებზე გვინდა საუბარი, მაშინ, პირველ რიგში, იტალიის ნაკრები უნდა ვახსენოთ. დიახ, ჩვენ თავი დაგვანებეთ, ფავორიტი იტალიაა. სკუადრა აძურამ” ბოლო მუნდიალი მოიგო და ახლაც არაჩვეულებრივ ფორმაშია.

ან, თუნდაც საფრანგეთი გავიხსენოთ. ტიერი ანრის გუნდი მსოფლიოს ვიცე-ჩემპიონია. ისინიც ფანტასტიკურად გამოიყურებიან. ვერ ვიტან, როცა ესპანურ პრესაში და ტელევიზიაში რადიკალურ განცხადებებს ვისმენ. ჟურნალისტები ხშირად ამბობენ, რომ ჩვენ საუკეთესო შემადგენლობა გვყავს და ვალდებულები ვართ, ევროპის პირველობაზე გავიმარჯვოთო.

ცხადია, ეს ვალდებულებაა, მაგრამ განა ყველა ადამიანი ახერხებს თავისი პროფესიული მოვალეობის პირნათლად შესრულებას? ფეხბურთი განსაკუთრებული ფენომენია. აქ წინასწარ ვერავინ ვერასდროს ვერაფერს ვერ განჭვრეტს. შეიძლება მეტოქეზე რამდენიმე თავით მაღლა იდგე, მაგრამ რამდენიმე შეცდომა დაუშვა და წააგო.

მოკლედ, სულაც არ ვთვლი, რომ ესპანეთის ნაკრები ფავორიტია. რა თქმა უნდა, ჩვენ გამარჯვებისთვის ვიბრძოლებთ, მაგრამ “სელექსიონს” ტურნირის ერთ-ერთ ჩვეულებრივ მონაწილედ მივიჩნევ.

საქმეს ისეთი პირი უჩანს, რომ ლუის არაგონესი 4-1-4-1 ტაქტიკას გამოიყენებს და სავარაუდოა, რომ თავდასხმაში მარტო მოგიწევთ თამაში. მზად ხართ ამისთვის?
- სხვათა შორის, “ლივერპულში” ძირითადად მარტო ვარ ხოლმე. სიმართლე გითხრათ, ჩემთვის დიდი მნიშვნელობა არ აქვს, მარტო ვითამაშებ თუ რომელიმე ფორვარდი დამეხმარება. მთავარია, გუნდის საერთო სქემა იყოს აწყობილი. ვფიქრობ, ტაქტიკურ მონახაზს გადამწყვეტი მნიშვნელობა ექნება და დარწმუნებული ვარ, არაგონესი სწორ სისტემას შეიმუშავებს.

ხომ არ გეჩვენებათ, რომ აღნიშნული სქემა მეტისმეტად ესპანურია? თანამედროვე ფეხბურთში არაგონესის ტაქტიკას ფაქტობრივად არავინ იყენებს…
- გეთანხმებით. “სელექსიონი” პრაქტიკულად ყველასაგან განსხვავებული სტილით თამაშობს, მაგრამ ამაში ცუდს ვერაფერს ვხედავ. შესაძლოა, ვინმემ იფიქროს, რომ ეს მოძველებული ფეხბურთია, მაგრამ ამ იდეასაც ხომ აქვს არსებობის უფლება? არაგონესი მაღალი კვალიფიკაციის სპეციალისტია და საჭიროების შემთხვევაში, ტაქტიკაში კორექტივების შეტანაც არ გაუჭირდება.

გარდა ამისა, ისიც უნდა ითქვას, რომ “სელექსიონი” ძალიან დაბალ ტემპში თამაშობს.
- ყველაფერი შედარებითია. “ჩელსის”, “მანჩესტერს” ან “ლივერპულს” თუ შევედრებით, ვიტყვით რომ ძალიან დაბალ ტემპში ვთამაშობთ, მაგრამ შეგვიძლია “ბარსელონას” მაგალითი მოვიტანოთ. კატალონიელები გადარეულებივით არასოდეს დარბიან, ბურთს ოსტატურად ათამაშებენ, მეტოქეს ავიწროვებენ და შეტევა დამაგვირგვინებელ ფაზაში გადაჰყავთ. ყველაფერი ხომ გემოვნებაზეა დამოკიდებული. რადგან ლუის არაგონესი ესპანეთის ეროვნული ნაკრების მწვრთნელია, მას უნდა ვენდოთ და მშვიდად მუშაობის საშუალება უნდა მივცეთ.

არაგონესმა არაერთი გამოცდილი ვეტერანი ფეხბურთელის სამსახურზე თქვა უარი. ხომ არ გეშინიათ, რომ ურთულეს ტურნირზე მეტად ახალგაზრდული შემადგენლობით მიდიხართ?
- არა მგონია, ყველაზე ახალგაზრდები და გამოუცდელები ვიყოთ. თუმცღა, შემადგენლობის გაახალგაზრდავებაშიც ცუდს ვერაფერს ვხედავ. პირიქით – რაც მეტი ძალა და ენერგია გვექნება, მეტ წარმატებასაც მივაღწევთ.

ევროპის ჩემპიონატზე ვისთან ერთად თამაშს ისურვებდით?
- თუ მაინცდამაინც ერთი გვარის დასახელებას მთხოვთ, გეტყვით, რომ ყველაზე მეტად სესკ ფაბრეგასთან ერთად თამაში მინდა. ესპანელებმა ჯერ კიდევ არ იციან, მისი სახით რამხელა ფეხბურთელი გვყავს. იგი მსოფლიოს ერთ-ერთი უდიდესი ვარსკვლავია. სამწუხაროდ, ჩვენში ბოლომდე3 ვერ აფასებენ, მაგრამ მოვა დრო, როცა მის გენიაზე ყველა აღმაფრენით ისაუბრებთ.

ევროპის ჩემპიონატის მონაწილეთაგან ყველაზე მეტად რომელმა გუნდმა გაგაოცათ?
- რუმინეთის ეროვნულმა გუნდმა. შესარჩევი ციკლი შთამბეჭდავად ჩაატარეს, თამაშის ხარისხსაც ვერ დაუწუნებთ. ძალიან მეცოდებიან, რადგან ურთულეს ჯგუფში მოხვდნენ. რა თქმა უნდა, ფავორიტები არ არიან, მაგრამ ჯგუფიდან გასვლა რომ მოახერხონ, სულაც არ გამიკვირდება.